瞓醒好多朋友都問我琴日個夢究竟咩事，最後發生咗咩事
我唯有都講下，始終對我嚟講都好大感受，呢一世都會記得琴日好多畫面
最近壓力好大，好多工作排山倒海需要處理，加上社會又發生咁多不愉快事件
心情真係好鬱燥，近來嘅事情唔多唔少都令我失望
當意識到自己情緒開始不穩時侯，我都決定唔睇咁多相關資訊，等自己情緒可以平穩返落嚟
所以有關行動我都無幫手宣傳，自己默默出算，又或者我已經灰心了?
琴日七一
我十二點就到咗金鐘夏慤道會合我朋友
嗰陣人數係好少好少，我估大約千幾人左右
天氣真係好熱，大家都好累咁搵個陰涼位坐底
由於現場一個警察都無，大家都無目的地坐，大家都知道如果再唔做返啲嘢時
七一就同往年一樣，遊行完就各自散，咩都無事發生，相信大家都唔想再次見到呢個情況發生
正當大家膠著時，我都想講下我驚訝嘅事
我見到一個好細嘅女仔拎住嘢飲問我要唔要
我好奇問佢：「係呢，我見你都好細過咁，你讀緊中幾？」
女仔：「讀緊中一。」
我同我朋友都互相望一望，然後問：「你自己嚟？你屋企人比？」
然後個女仔話：「我自己呀，放心，我唔會行前，但我會幫大家遞水，我屋企人都唔知我嚟。」然後佢指住自己件，死.....唔記得咗個隻色點打，總之係" 肉" 色嘅衫，意即佢唔敢著黑衫，廢事屋企人懷疑。
最後大家互相加油，佢就繼續拎水比人。
之後到義士衝擊立法會側門時
我電話就有好多Whatsapp問 "唔明點解要衝立法會"
其實我覺得2019年了，真係明白呢個政治環境同對政府嘅作風熟悉就唔會再問點解要衝立法會呢類問題
我地唔應該眼看呢班義士嘅行為，而係應該諗下佢地做呢個行為「背後」 係咩原因
衝擊開頭大家一時之間都未接受到呢個場面，每一下撞擊玻璃聲音都震撼現場每一個人
所以大家都戰戰競競，所以得返大約廿幾人用遮行前遮住義士
而身後班人就比較退得後啲，呢個場面令我有啲失望
就好似我地一班人，睇住呢班人默默咁犯緊法
造成個畫面好分離，亦都造成一個現象
令人覺得前面班人係咪鬼 係咪黑社會?
似乎呢個情況大家都感受到
所以都大叫 " 大家，其實唔衝係無問題，但大家唔好企到咁後，我地行前啲打氣都好丫!"
氣氛先開始融合返
後來過咗幾個鐘，我都企到累了 坐咗喺側門休息
抖抖下突然大家都將目標放喺煲底立法會正門
今次大家都改變了，終於一班人衝前支持，打氣
真係架，塊玻璃硬到仆街，我都唔知佢地扑咗幾粒鐘
如果無打氣同支持，點捱?
中間嘅事唔講了
最後只想講下最後，其實大家唔係蠢，唔好喺網上面講到現場嘅人無腦咁
雖然義士視死如歸，但我地都唔希望義士出事
所以講好咗，十二點就會作出宣言，而宣言後就會 「一齊走」
呢一個係我地共識
去到十一點左右，已經有零零聲聲嘅消息表示有警察到場，令到氣氛好緊張
因為大家都望一望個錶，仲有成大半個鐘先到十二點，究竟大家捱唔捱呢?
十一點五十分鐘左右，會展嗰邊已經出動防暴警察，數量好多，決意清場
但仲有十分鐘先到義士宣言
所以現場好多人都去會展嗰邊支援，我地都知道守唔到 頂唔到 阻唔到
但我地要為義士爭取多十分鐘時間
呢十分鐘一直都好緊湊
我地開始叫大家準備走，開始要疏導返人群，因為撤退得急而有意外
但大家只係鬆返啲空間出嚟 我地係無走
因為 我地要等到義士出嚟
去到十二點
會展嗰邊已經出煙 已經守不到
慶幸義士已經夠鐘可以走
但相信大家都知道，義士唔肯走
我地就急了
好多人都喊咗話：「唔係講好咗十二點一齊走咩？」
我都急了 眼前啲煙湧埋嚟 我就更加激動
現場所有人都大叫 「一齊走！一齊走！一齊走！」
呢個場面 呢種情緒 呢種團結
我呢世都記得
後來我地真係真係真係真係真係等到最後一刻
拉返義士出嚟
我地即刻放心一齊走
我想講嘅係，整個六月大家都好灰心，係真係好灰心
而琴晚雖然唔係話爭取到啲咩
但我覺得最大得著嘅係 「鼓舞」，將整個六月嘅灰沉氣氛一掃而空
為大家打咗支強心針，增強大家士氣
呢一點就已經足夠
所以唔好再講咩暴徙 咩有冇用 咩衝黎做咩 呢啲老套嘢了 2019年喇
琴日見到好多好耐無聯絡嘅朋友，估唔到平時食飯約唔到，但就喺呢個場合到見面，亦感謝朋友千里送尿袋為我手機續命，感覺好特別。
最後我知道班警察一定會秋後算帳
唔理義士有冇事都好，我都會支持你地
我地都會記住你地琴日為香港為我地付出嘅努力
感謝你
最後，政府你要知道，要停止再有呢類行為嘅人唔係我地，係你地政府
唔該回應我地訴求
最最最最後都想講，無論咩活動都好，人數好緊要
無人嘅話咩都做唔到
上網睇直播同你現場前線睇嘅係兩回事，真係兩回事
我地就算無做任何野都好，但只要在場就會有自己嘅角色
支持好緊要，人數好緊要
希望大家會多啲出嚟 用自己個心 用自己對眼 去判斷 去感受 現場究竟發生緊咩一回事
加油
漏咗講
以上所有事情都係發緊夢
完
Search